ازدواجی زندگی میں میاں بیوی کو ایک دوسرے کے ساتھ کیسا برتاؤ برتنا چاہیے

شادی کے ذریعے میاں بیوی زندگی کے سفر میں ایک دوسرے کے رفیق سفر بن جاتے ہیں اور چونکہ یہ سفر طویل ہے تو ان کی رفاقت بھی طویل ہی ہوتی ہے شاید اسی لئے میاں بیوی کو ایک دوسرے کا رفیق حیات یعنی زندگی بھر کا ساتھی کہا جاتا ہے۔ اس طویل سفر میں جا بجا نشیب و فراز آتے رہتے ہیں اس لئے ہنسی خوشی اس سفر کو طے کرنے کے لئے میاں بیوی میں سے ہر ایک کو چاہئے کہ وہ غور کرے کہ مجھے دینی و دُنیوی اعتبار سے کامیاب شوہر یا کامیاب بیوی کا کردار ادا کرنے کے لئے کن اوصاف و اَخلاق کا حامل ہونا چاہئے۔ آئیے! مُلاحَظہ کیجئے کہ کامیاب شوہر کو کن اَخلاق کا خیال رکھنا چاہئے :

 ◉ شوہر کو کیسا ہونا چاہئے؟

 ◉ 1۔ شوہر کو چاہئے کہ وہ حسنِ اَخلاق ، نرم مِزاجی ، رحمدلی کے ساتھ اپنی بیوی سے پیش آئے۔ اُسے تکلیف نہ پہنچائے، گالی نہ دے، حیا سے عاری، اَخلاق سے گرے ہوئے بازاری الفاظ نہ بولے ، مسکراتے چہرے سے ملاقات کرے ، خُوشحالی اور تنگدستی ہر حالت میں اس سے میٹھی اور عُمدہ گفتگو کرے ، بیوی کو احساس دلائے کہ میرے دل میں تمہارا بلند مقام ہے۔

 2۔ شوہر کو چاہئے کہ وہ اپنی بیوی پر ظُلم و زِیادَتی نہ کرے ، اس کے حُقوق کی ادائیگی میں کوتاہی نہ برتے بلکہ عدل و انصاف قائم رکھے۔ اگر ایک سے زیادہ بیویاں ہوں تو ان کے درمیان بھی عدل و انصاف کو ملحوظ رکھے ، کسی ایک کی طرف زیادہ مائل ہونے سے گُریز کرے ، رسولِ کریم ، رؤف رحیم صلی اللہ علیہ وآلہ وسلم نے فرمایا : جس کی دو بیویاں ہوں اور ان میں سے کسی ایک کی طرف اُس کا میلان زیادہ ہو تو وہ قیامت کے دن اس حال میں آئے گا کہ اُس کا ایک پہلو مفلوج ہوگا۔ (ترمذی ، کتاب النکاح ، باب ماجاء فی التسویة بین الضرائر ، ۲ / ۳۷۵ ، حدیث : ۱۱۴۴) خود ہمارے پیارے آقا صلی اللہ علیہ وآلہ وسلم بھی تعلیم اُمّت کے لئے اپنی ازواج مطہرات میں عدل و انصاف کا خُوب خیال فرماتے چنانچہ اُمُّ المومنین حضرت سیدنا عائشہ صدیقہ رضی اللہ تعالٰی عنہا فرماتی ہیں : ہمارے ہاں قیام کی تقسیم کے معاملے میں ہم میں سے کسی کو کسی پر فضیلت و ترجیح نہیں دیتے تھے۔ (ابو داؤد کتاب النکاح ، باب فی القسم بين النساء ، ۲ / ۳۵۳ ، حدیث : ۲۱۳۵) 

3۔ شوہر کو چاہئے کہ وہ بیوی کے راز کو اپنے سینے میں چُھپائے رکھے نیز اس کی امیدوں، دُکھوں اور اچھی بُری باتوں یا عادتوں کو بِلا مَصلِحت کسی پر ظاہر نہ کرے، اس کے حسنِ ظاہر اور حسنِ باطن کو غیروں بالخصوص مَردوں پر ظاہر نہ کرے ، خاص طور پر صحبت کے وقت کے راز تو اشارتاً بھی بیان نہ کرے۔ یہ سخت نا جائز و حرام اور حیا سے عاری کام ہے، حدیثِ مُبارَکہ میں ہے : اللہ تعالیٰ کے نزدیک قیامت کے دن بَدترین شخص وہ ہوگا جو اپنی عورت کے قریب جائے اور عورت اس کے پاس جائے پھر وہ شخص اس کا راز ظاہر کردے۔ (مسلم ، کتاب النکاح ، باب تـحریم افشاء سر الـمرأة ، ص ۵۷۹ ، حدیث : ۳۵۴۲)

 4۔ شوہر کو چاہئے کہ گھریلو کاموں میں بیوی سے ہونے والی غلطیوں سے درگُزر کرے اور گالی گلوچ کرنے، مارنے پیٹنے اور جِھڑکنے کے بجائے پیار سے سمجھائے كيونكہ عورت عموماً نرم دل ہوتی ہے اور محبت چاہتی ہے لہٰذا نرمی و پیار سے سمجھانے سے بات اس کی سمجھ میں آجائے گی۔ اس کے بَر خِلاف اگر شوہر بیوی کی غلطیوں کی تاک اور عیبوں کی تلاش میں رہے گا تو لڑائی جھگڑا ہوتا رہے گا اور شیطان خُوشی مناتا رہے گا کیونکہ وہ یہی تو چاہتا ہے کہ میاں بیوی میں فساد برپا ہوجائے اور ان کی زندگی اجیرن بن جائے۔

 5۔ شوہر کو چاہئے کہ وہ اپنی بیوی کی دینداری ، حسنِ اَخلاق اور اعلیٰ فضائل و خصائل پر نظر رکھے ، صرف اس کے ظاہر کو نہ دیکھے ، باطن پر بھی توجّہ دے۔ ظاہری حسن دھوکہ ہوتا ہے اور باطنی حسن قیمتی ہوتا ہے جو ہمیشہ قائم رہتا ہے۔

 6۔ شوہر کو چاہئے کہ وہ خود بھی نماز روزے کی پابندی اور دیگر نیک کام کرے اور اپنی بیوی کو بھی نیکیوں میں بڑھ چڑھ کر حصہ لینے ، سنَّتوں پر عمل کرنے اور عبادات بجالانے کی ترغیب دیتا رہے ، دین کے ضروری مسائل سیکھنے میں اُس کی مدد کرے ، قرآنِ پاک کی تلاوت اور مختلف کاموں سے پہلے کی مسنون دعائیں پڑھنے کی تلقین کرے، اسے اللہ تعالیٰ کی راہ میں صدقہ و خیرات کی ترغیب دلائے تاکہ دل سے مال کی محبت نکلے اور آخرت بہتر ہو، غرض یہ کہ بال بچوں کی اصلاح کی کوشش جاری رکھنی چاہئے اللہ تعالٰی ارشاد فرماتا ہے : یٰۤاَیُّهَا الَّذِیْنَ اٰمَنُوْا قُوْۤا اَنْفُسَكُمْ وَ اَهْلِیْكُمْ نَارًا وَّ قُوْدُهَا النَّاسُ وَ الْحِجَارَةُ(پ۲۸ ، التحریم : ۶) ترجمہ کنز الایمان: اے ایمان والو! اپنی جانوں اور اپنے گھر والوں کو اُس آگ سے بچاؤ جس کے ایندھن آدمی اور پتھر ہیں۔ 

7۔ شوہر کو چاہئے کہ اپنی بیوی کی خُوشنودی کی خاطر ظاہری باطنی صفائی کا خیال رکھے داڑھی مونچھ اور سر کے بالوں کا مناسب بندوبست رکھے ، تیل کنگھی کا اِہْتِمام کرے، اندرونی بالوں کی مناسب وقت پر صفائی کرے، صاف ستھرا لباس زیبِ تن کیا کرے اور شریعت کی حد میں رہتے ہوئے ہر اعتبار سے زینت اختیار کرے۔ حضرت ابن عباس رضی اللہ تعالٰی عنہ نے فرمایا : بلاشُبہ میں اپنی بیوی کے لئے زینت اختیار کرتا ہوں جس طرح وہ میرے لئے بناؤ سنگھار کرتی ہے اور مجھے یہ بات پسند ہے کہ میں وہ تمام حقوق اچھی طرح حاصل کروں جو میرے اُس پر ہیں اور وہ بھی اپنے حقوق حاصل کرے جو اس کے مجھ پر ہیں۔ کیونکہ اللہ تعالیٰ ارشاد فرماتا ہے: ﴿وَلَـھُنَّ مِثْلُ الَّذِیْ عَلَیْھِنَّ بِالْمَعْرُوْفِ ﴾(اور عورتوں کا بھی حق ایسا ہی ہے جیسا اُن پر ہے شرع کے مُوافق) اور آپ رضی اللہ تعالٰی عنہ ہی سے یہ بھی مروی ہے کہ بیویوں کے ساتھ اچھی صحبت اور بہتر سُلوک خاوندوں پر اسی طرح لازم ہے جس طرح بیویوں پر ہر اُس (جائز) کام میں خاوندوں کی اطاعت واجب ہے جس کا وہ اُنہیں حکم دیں۔ (تفسیر قرطبی، پ ۲، البقرة، تحت الاية : ۲۲۸، ۲ / ۹۶) 

8۔ جب بیوی کسی تکلیف ، دُکھ درد اور مشکل میں ہو یا بیمار ہوجائے تو شوہر کو چاہئے کہ اُس کا ساتھ دے ، اُس کے ساتھ حقیقی ہمدردی کرے ، بیماری میں بیوی کی کیفیت کے مطابق اُسے گھریلو کام کاج میں مُناسب رِعایت دے اور اُس کا ہاتھ بھی بٹائے ، اُس کی پریشانی دور کرنے اور علاج مُعالجہ کروانے کی طرف خُصُوصی توجّہ دے ، اس معاملے میں سُستی و بے پروائی ، بخل و کنجوسی یا بیزاری کا مُظاہَرہ کرنا باہمی محبت اور گھریلو ماحول پر منفی اثرات مُرتّب کرتا ہے۔

 9۔ شوہر کو چاہئے کہ اگر بیوی کبھی کسی بات پر روٹھ جائے تو خود بھی خفا ہو جانے کے بجائے اُسے مَنانے کی کوشش کرے اور یہ باتیں پیشِ نظر رکھے کہ جب میں خود روٹھتا ہوں تو وہ بھی مجھے مَناتی اور میرے ناز نخرے اُٹھاتی ہے ، آج اگر وہ ناراض ہو گئی تو کیا ہوا ، وہ بھی تو آخر انسان ہے ، اُسے بھی تو کسی بات پر غُصّہ آسکتا ہے ، میں اُسے پیار محبت سے مَنا لوں گا تو کونسی قیامت آجائے گی وغیرہ وغیرہ۔ یاد رکھئے ! بیوی کے روٹھ جانے پر اُسے اہمیَّت نہ دینا اور ناراض چھوڑ دینا بے مُروّتی کی بات ہے۔ اللہ تعالٰی نے مرد کو اگر عورت پر فضیلت عطا فرمائی ہے تو عورت کو بھی کئی اعتبار سے عظمتیں عطا کی ہیں۔ 

◉ بیوی کو کیسا ہونا چاہیے؟ ◉

 1۔ بیوی کو چاہئے کہ اپنے حسنِ اَخلاق، ثابت قدمی اور عُمدہ عادات و اوصاف کے ذریعے اپنے شوہر کا دل جیت لے اور سُسرال میں اپنا وَقَار قائم کرے۔ بد خُلقی اور بدمِزاجی سے پرہیز کرے۔ اپنے شوہر کے لئے تسکین کا باعث بنے، اس کی خواہش کا خیال رکھے اس کے ساتھ شدید محبت و اُلفت کا اظہار کرے۔

 2۔ بیوی کو چاہئے کہ ہر نیک اور جائز کام میں اپنے شوہر کی اِطاعت و فرمانبرداری کرے ، اس کی ہر جائز طلب پر لبّیک کہہ کر اس کی محبت کی انتہا تک پہنچنے کی کوشش کرے، اپنی اور شوہر کی عزّت کی حفاظت کرے ، ہمیشہ اپنے شوہر کا احترام کرے اور اس کو خُوش رکھنے کے جَتَن کرتی رہے کیونکہ شوہر کی خُوشی اور اطاعت گُزاری میں ہی بیوی کے لئے جنّت کی حق داری ہے۔ نبیِ رحمت، مالکِ جنّت صلی اللہ علیہ وآلہ وسلم نے ارشاد فرمایا : عورت جب پانچوں نمازیں پڑھے، رمضان کے روزے رکھے، اپنی عزّت و عِصْمت کی حفاظت کرے اور اپنے شوہر کی اِطاعت کرے تو اس سے کہا جائے گاکہ جنّت کے جس دروازے سے چاہے جنّت میں داخل ہوجا۔ (مسند احمد، مسند عبد الرحـمن بن عوف، ۱ / ۴۰۶ ، حدیث: ۱۶۶۱ 

3۔ بیوی کو چاہئے کہ شرم و حیا کا زیور اپنائے اور شوہر کی غیرت کا لحاظ رکھے، اس کی غیر موجودَگی میں بیگانوں کو گھر میں داخل ہونے کی اجازت نہ دے، اگر شوہر کی غیر موجودَگی میں شوہر کا کوئی دوست گھر میں داخل ہونے کے لئے اجازت طلب کرے تو خود پر اور شوہر پر غیرت کھاتے ہوئے نہ تو اس کو گھر میں داخل ہونے دے اور نہ ہی سوال و جواب کا سلسلہ کرے البتہ اگر دروازے کے پیچھے سے مجبوراً کسی بات کا جواب دینا پڑے تو آواز میں نرمی و لچک پیدا کئے بغیر روکھے انداز میں مختصر جواب دے دے۔ یونہی اگر راستے میں کہیں شوہر کے دوست سے آمنا سامنا ہوجائے تو اس کو ہر گز اپنی پہچان نہ کرائے بلکہ جس غیر محرم شخص کے بارے میں یہ گمان ہو کہ وہ اسے جانتا ہے یا یہ اسے جانتی ہے تو اس کے سامنے بھی اجنبیت کا مظاہرہ کرے۔

 4۔ بیوی کو چاہئے کہ جو کچھ ربّ تعالیٰ نے اس کے شوہر کو دیا ہے اسی پر راضی رہتے ہوئے ربّ تعالیٰ کا شکر ادا کرے ، اگر شوہر کی آمدنی کم ہے تو اس کو کم آمدنی پر طعنے نہ دے کہ وہ حرام روزی میں پڑ جائے بلکہ اُس کا حوصلہ بڑھائے اور اُسے حرام سے بچ کر حلال روزی کمانے ہی کی تلقین کرے۔ چنانچہ امام غزالی رحمۃ اللہ علیہ فرماتے ہیں: گزشتہ زمانے میں عورتوں کی عادت تھی کہ مرد گھر سے نکلنے لگتا تو اس کی بیوی یا بیٹی اس سے کہتی: حرام کمائی سے بچتے رہنا ، ہم بھوک وتکلیف تو برداشت کر سکتے ہیں لیکن جہنّم کی آگ برداشت نہیں کر سکتے۔( احیاء العلوم ، ۲ / ۲۱۹) 

5۔ بیوی اپنے شوہر کی راز دار بن کر رہے، شوہر کی کوئی بات بھی اپنی سہیلیوں وغیرہ کے سامنے بیان نہ کرے ، بالخصوص اپنے اور شوہر کے پوشیدہ معاملات تو ہرگز ہرگز نہ بتائے۔ رسولِ اکرم نور مجسم صلی اللہ علیہ وآلہ وسلم نے ارشاد فرمایا : روز قیامت اللہ تعالٰی کے نزدیک سب سے بُرا وہ ہوگا جو اپنی بیوی سے یا جو بیوی اپنے شوہر سے حاجت پوری كرے اور اپنے ہمسفر كا راز فاش كر دے۔ (مسلم، كتاب النكاح، باب تـحریم افشاء سر المرأة، ص۵۷۹ ، حدیث: ۳۵۴۳) 

6۔ بیوی کو چاہئے کہ شوہر سے نہ ضرورت سے زیادہ حیا کرے اور نہ ہی حد سے بڑھ کر بے تکلّف ہو البتہ شوہر کے مِزاج کو ضرور مدِّ نظر رکھے، اس سے لڑائی جھگڑا نہ کرے، جب شوہر بات کرے تو خاموشی اختیار کرے اور غور سے سنے، شوہر کے گھر والوں اور قرابت داروں کا احترام کرے ، اچھے انداز میں شوہر کا حال دریافت کرے اور جب اسے دیکھے تو خُوشی سے ملے اور اپنائیت کا اظہار کرے۔

 7۔ شوہر کے مال میں حسنِ تدبیر اختیار کرے ، شوہر کی اجازت کے بغیر اُس کا مال خرچ نہ کرے اور نہ ہی میکے والوں کو کچھ دے بلکہ بغیر اجازت صدقہ بھی نہ کرے اور اجازت سے بھی فضول خرچ نہ کرے۔ 

8۔ بیوی کو چاہئے کہ اپنے مکان، بدن اور کپڑوں کی صفائی ستھرائی کا خاص طور پر خیال رکھے۔ جب شوہر اپنے کام سے فارغ ہو کر گھر آئے تو اچھی حالت میں بہتر انداز سے اُس کا استقبال کرے۔

 9۔ بیوی کو چاہئے کہ اپنے شوہر کی اَولاد سے محبت کرے، ان کی اچھی تربیت کرے، چھوٹے بچّوں کو خاص طور پر نہلا دُھلا کر اُجلا رکھے، بڑے بچّوں کی صفائی سُتھرائی کا بھی خیال کرے، وقت پر صاف ستھرے کپڑے مُہَیّا کرے ، ان پر ہمیشہ شفقت کرے اور ان کو خُوش رکھے۔ چنانچہ حضور نبیِ رحمت ، شفیعِ اُمّت صلی اللہ علیہ وآلہ وسلم نے ارشاد فرمایا: بے شک جنّت میں ایک گھر ہے جسے “الفرح“ کہا جاتا ہے۔ اس میں وہی لوگ داخل ہوں گے جو بچّوں کو خُوش کرتے ہیں۔ (جامع صغیر، ص۱۴۰، حدیث : ۲۳۲۱)

 10۔ بیوی کو چاہئے کہ حکمت و دانائی ، سچائی اور سمجھداری کو اپنا زیور بنالے ، بات کو پہلے تولے بعد میں بولے ، گالی گلوچ اور فحش گوئی وغیرہ سے اپنی زبان آلودہ نہ کرے۔ 

11۔ جب شوہر کسی وجہ سے پریشانی کا شکار ہو تو اس کا حوصلہ بڑھائے، اگر وہ غصے میں ہو تو اس کے سامنے ایسی گفتگو کرے جس سے اس کا غُصّہ ٹھنڈا ہوجائے ، اگر کسی بات پر نصیحت کی ضرورت محسوس کرے تو ایسے انداز میں نصیحت کرے کہ شوہر کو ناگوار نہ گزرے، ہر وقت نصیحت کرنے سے گُریز کرے، اگر شوہر مشورہ طلب کرے تو ایسا مشورہ دے جو دینی، اخلاقی اور معاشرتی اعتبار سے دُرُست اور شوہر کے حق میں مفید ہو۔ 

12۔ بیوی کو چاہئے کہ شوہر کی پسند کو اپنی پسند بنائے، اُس کی طبیعت کو سمجھنے کی کوشش کرے کہ اُسے کیا اچھا اور کیا بُرا لگتا ہے، رہن سہن کے معاملے میں اپنا رَوَیّہ ایسا رکھے کہ شوہر کے دل میں یہ بات بیٹھ جائے کہ میں اپنی بیوی کے نزدیک بہت اچھا ہوں اور وہ میرے ساتھ تنگدستی و فراخ دستی اور خُوشی و غمی ہر حال میں خُوش ہے۔